BLOG GWADD Gan Iestyn Tyne

Dyma lansiad cyffrous o fideo gan Iestyn Tyne.

Iestyn Tyne: Am Y Darn

Dyma ddarn gyfansoddwyd mewn byr amser (drafft ydi o’n dal i fod, a dweud y gwir!) ar ein preswyliad yn Kovalam ar arfordir Kerala, lle cawson ni dreulio rhywfaint o amser yng nghwmni pysgotwyr lleol. Roeddem wedi gobeithio clywed ganddyn nhw rhai o’r siantiau a genir ganddyn nhw wrth lusgo’r rhwydi llawn i’r lan; ond ar y boreau y buom ni hefo nhw, roedd y rhwydi’n codi’n wag ac felly doedd dim i ganu yn ei gylch. Draw ar y gorwel roedd llongau pysgota enfawr yn patrolio, a rownd y penrhyn, peiriannau anghenfilaidd wrthi’n cloddio ar gyfer siwpyrborthladd fydd yn derbyn dros hanner holl fewnforion India. A dyma feddwl am y bygythiadau sy’n wynebu’r math yma o fywoliaeth ledled y byd, ac yn nes adra o lawer nac arfordir De India hefyd…

Manylion y fideo:

Ffilmwyd yn Kovalam, Kerala, Chwefror 2024

Ffilmio a chynhyrchu gan Montenegro Fisher

Prosiect Llenyddiaeth ar draws Ffiniau gyda chefnogaeth Cronfa Ryngwladol y Pedair Cenedl, Celfyddydau Rhyngwladol Cymru, Sefydliad D C Kizhakemuri a’r Mathrubhumi International Festival of Letters.

---

Magwyd Iestyn Tyne yn Llŷn ond mae bellach yn byw ac yn gweithio yng Nghaernarfon. Mae’n llenor, yn gerddor, yn gyfieithydd ac yn artist. Mae’n gyd-sylfaenydd a chyd-olygydd cylchgrawn a chyhoeddiadau’r Stamp, tŷ cyhoeddi Cymraeg annibynnol, gwirfoddol a chydweithredol. Ei bamffled diweddaraf o gerddi yw Dysgu Nofio, dewis ar gyfer Silff Lyfrau Cyfnewidfa Lên Cymru 2023-24.