Cerdd gan Siôn Tomos Owen

O’r copa i’r côr

Diferyn yn disgyn yn rhydd, i ddechrau llif sy’n gudd dan ddaear yna llwyddiant ffynhonell i godi nant sy’n neidio dros lethrau, swigod yn pefrio ac yn swnio fel plant yn chwerthin, yn chwarae yn y caeau, yn tasgu dros greigiau neu’n sisial heibio’r rhedyn cân y gwrych i swyno’r synhwyrau. Ond mewn troad yn ffeindio ffordd i aber hen ffrindiau, o'u ffrydiau yn y bannau, wedi tynnu i lawr y cloddiau i ymuno, yn sydyn yn tyfu’n fwy, fel llwyaid wedi llyncu i’r afon. Yn llifo’n igam ogam yn perfformio, yn plymio, dŵr sydd yn cofio llifogydd a sychder, y pysgod, yr adar, y nofio, y newid a ddaw gyda glaw. Gall argae dagu cwm i fagu cronfa, llyn beichiog rhwng bryniau, ond daw bloedd y rhaeadrau i fyrlymu dros glogwyni, i ddisgyn i'r dyfroedd, i lawr rhwng mynyddoedd, coedwigoedd a chymoedd.
Yna un newid ola’ heibio bola’r bae, yn ymestyn ymhellach, fel braich yn ceisio mwytho, i gofio’r copa, a chanu clôd i natur y daith, yn cyrraedd a chlywed y gân odidog hallt, y dôn yn atseinio o leisiau’r côr, a dyma hi'n llithro i donnau’r môr.

Siôn Tomos Owen lives and works in Treorchy, Rhondda Fawr as a Freelance Creative. He has written children’s books, books for Welsh learners and poetry.  He runs creative workshops through his company CreaSion. His English language collections are published by Parthian, and his first Welsh language collection, Pethau Sy’n Digwydd, wa spublished by Barddas in 2024. Mae Siôn Tomos Owen yn byw ac yn gweithio yn Nhreorci, Rhondda Fawr fel person Llawrydd Creadigol, Mae wedi ysgrifennu llyfrau i blant, llyfrau i ddysgwyr a barddoniaeth. Mae’n cynnal gweithdai creadigol trwy ei gwmni, CreaSion. Cyhoeddwyd ei gasgliadau o farddoniaeth Saesneg gan Parthian a cyhoeddwyd ei gasgliad Cymraeg cyntaf, Pethau Sy’n Digwydd, gan Barddas yn 2024.