Penglog
Cymerais i ddechrau ei fod yn fath o flodyn.
Un prin, ac anghyfarwydd, ei betalau
wedi naddu fel cangell eglwys
yn wag ac ymestynnog.
Ond doedd o ddim.
Bu yno, mae’n siŵr
ers misoedd, yn diosg
cnawd a phlufiach.
Yn aros i gael ei ganfod
yn noeth a gwyn.
Roedd hi’n Ebrill, ac roedd gwenoliaid
ac adar gwrwm bach
yn gwneud sôn amdanyn nhw eu hunain
uwch y stryd.
Does neb angen cerdd natur arall,
a nid dyna ydi hon. Mae hi’n gerdd
am esgyrn ac eglwysi a phethau yr hoffwn dorri.
Mae Grug Muse yn fardd ac ysgrifwr o Ddyffryn Nantlle. Daeth ei chyfrol ddiweddaraf, merch y llyn i’r brig yng nghategori barddoniaeth Gwobr Llyfr y Flwyddyn, 2022. Mae hi’n un o sylfaenwyr a golygyddion Cyhoeddiadau’r Stamp a chylchgrawn barddoniaeth Ffosfforws. Mae hi hefyd yn un o gyd-olygyddion y gyfrol Welsh (plural) (Repeater, 2022), cyfrol o ysgrifau sy’n dychmygu Cymru gynhwysol a neilltuol.
Modron Magazine 